|
Lèsbreef 'In Limburg zit meziek'
De commissie
Veldeke-Volkscultuur haet giestermiedig 21 oktober, geholpe
door Veldeke-Valkeberg, ‘n nuuj lèsbeukske gepresenteerd,
mèt es titel ‘In Limburg zit meziek’. Letterlik, dink mer
aan oos zangerige taal, oos hermenieë en fanfares, de
kwetsjbuul, ’t örgel in de kèrk, oos zangkoare en
vastenaovend.
De presentatie vong plaats
in de nuuj basissjoal Valkenburg same mèt de groepe 5 t/m 8.
’t Iersjte exemplaar waor veur zenger en componis Guus
Sjmeets, dae zien sjpore op ’t gebied van dialekmeziek ten
volle verdeend haet.
Veldeke houp dat ’t lèsbeukske behandeld zal were op alle
basissjoale in de ganse provincie. Ze houp dat ’t vak
meziek wir de nuèdige aandach zal kriege op de
basissjoale, want meziek huèrt, zjuus wie oos eige taal, bie
oze volkscultuur en moet leefs gesjtimuleerd were op jonge
laeftied. ’t Beukske ies bedoeld veur de groepe 7 en 8, meh
geuf ouch volwassene compacte informatie. En, umdat de teks
in de volkstaal gesjreve sjteit, ies ’t metein ouch ’n
dialeklès.
De
volgende onderwerpe komme aan de orde: Limburgs ’n
toantaal; de sjtum en ’t zinge; soorte instrumente um kinger
te helpe ’n keus te make; ’t zelf knutsele van ’n eenvoudig
instrument um mèt vastenaovend te gebruke. Gezellige
mezieksjpelkes um same te doon. Meziek loestere, sjpele,
sjrieve. Recept noeëtekook. ’n Paar gedichskes. Weblinks um
wiejer info te zeuke. Op de websites veldeke.net en
veldeke-valkeberg.nl sjteit de lèsbreef te leze en zelfs in
’t Nederlands.
De jeughermenie
van Walram’s genootschap,
o.l.v. Evelyn Dirix, waor aanwezig um oetlèk geve euver de
soorte blaos- en druminstrumente, die in ‘t lèsbeukske
besjreve sjtoon. De kinger mochte ze allemaol oetprobere en
dao woort grif gebruuk van gemaak. Dat dat waal beveel merke
veer aan de opmerking van ‘ne jong, nao aafloup: “Ich wil
later drummer waere!”
Op ’t ing van de bie-einkoms
sjpeelde ’t jeugorkes veur de jeug herkènbaar melodieë en ’t
Limburgs volksleed um de miedig muzikaal aaf te sjlete.
Samesjtèlling en tekste
in de lèsbreef zint van
Els Diederen oet
Valkeberg in 't Valkebergs
Opmaak door Hans Simons oet Zjwame (Swalmen)
Lesbreef (webkwaliteit)
in 't Limburgs
(Valkebergs)
Lesbreef (webkwaliteit)
in 't
Nederlands
informatie op internet
euver meziek op sjoal, veur kinger, instrumente loestere enz:
http://www.kiesjeinstrument.nl/home
|
